Exo 18 | NdeIBE | STEP | UJethro, umphristi waseMidiyani owayenguyisezala kaMosi, wezwa konke uNkulunkulu ayekwenzele uMosi labantu bakhe bako-Israyeli, lokuthi uJehova wayebakhuphe njani eGibhithe abako-Israyeli.

Exodus 18

UJethro wethekelela uMosi

1 UJethro, umphristi waseMidiyani owayenguyisezala kaMosi, wezwa konke uNkulunkulu ayekwenzele uMosi labantu bakhe bako-Israyeli, lokuthi uJehova wayebakhuphe njani eGibhithe abako-Israyeli. 2 Ngemva kokubana uMosi esethumele umkakhe uZiphora kibo, uyisezala uJethro wamemukela,

3 lamadodana akhe amabili. Eyinye indodana kwakuthiwa nguGeshomi, ngoba uMosi wathi, “Sengibe ngumuntu wezizweni elizweni elingayisilo lami.” 4 Eyinye kwakuthiwa ngu-Eliyeza ngoba wathi, “UNkulunkulu kababa wayengumsizi wami: wangisindisa enkembeni kaFaro.” 5 UJethro, uyisezala kaMosi kanye lamadodana lenkosikazi kaMosi, beza kuye enkangala lapho ayehlala khona eduzane lentaba kaNkulunkulu. 6 UJethro wayethumele ilizwi kuye wathi, “Mina uyihlozala uJethro ngiyeza kuwe lenkosikazi yakho lamadodana ayo amabili.” 7 Yikho-ke uMosi waphuma wayahlangabeza uyisezala wasemkhothamela wamanga. Babingelelana basebengena ethenteni. 8 UMosi watshela uyisezala ngakho konke uJehova ayekwenze kuFaro labantu baseGibhithe ngenxa yabantu bako-Israyeli langezinhlupho zonke ezabehlela endleleni lokuthi uJehova wayebasindise njani. 9 UJethro wathokoza ukuzwa ngezinto zonke ezinhle uJehova ayezenzele u-Israyeli ekubasindiseni esandleni samaGibhithe.

10 Wathi, “Kadunyiswe uJehova owalisindisa esandleni samaGibhithe loFaro, njalo owasindisa abantu esandleni samaGibhithe.

11 Khathesi sengikwazi ukuthi uJehova ulamandla ukwedlula abanye onkulunkulu ngenxa yokuthi wenza lokhu kubo bonke abaphatha u-Israyeli ngobuqholo.” 12 Lapho-ke uJethro, uyisezala kaMosi, waletha umnikelo wokutshiswa leminye iminikelo kuNkulunkulu, njalo u-Aroni weza labadala bako-Israyeli ukuze bazokudla isinkwa loyisezala kaMosi phambi kukaNkulunkulu.

13 Ngelanga elilandelayo uMosi wathatha isihlalo sakhe sokuba ngumthonisi wabantu, njalo bema bemgombolozele kusukela ekuseni kwaze kwaba yintambama.

14 Kwathi uyisezala esebone konke uMosi ayekwenzela abantu wathi, “Kuyini lokhu okwenzela abantu? Kungani uhlala unguwe wedwa ukuba ngumahluli, abantu bonke bemi bekuhanqile kusukela ekuseni kuze kube kusihlwa?” 15 UMosi wamphendula wathi, “Ngenxa yokuthi abantu beza kimi ukuzodinga intando kaNkulunkulu. 16 Kuso sonke isikhathi uma kulengxabano, ilethwa kimi, njalo ngiyahlulela kumacele womabili besengibatshela ngemithetho lemilayo kaNkulunkulu.”

17 Uyisezala kaMosi waphendula wathi, “Konke okwenzayo kakulunganga. 18 Wena labantu laba abeza kuwe lizazidinisa. Umsebenzi lo unzima kuwe: ungeke wawenza wedwa. 19 Ngilalela ngikucebisa, njalo uNkulunkulu makabe lawe. Kumele ube ngummeli wabantu kuNkulunkulu, ulethe izingxabano zabo kuye. 20 Bafundise imilayo lemithetho ubatshengise indlela yokuphila lemisebenzi okumele ukuthi bayenze.

21 Kodwa khetha amadoda anelisayo phakathi kwabantu bonke – amadoda azonda inzuzo eza ngobuqili – ubusubabeka babe yizinduna zezinkulungwane, zamakhulu, zamatshumi amahlanu, lezamatshumi. 22 Benze babe ngabahluleli babantu kuso sonke isikhathi, kodwa kabalethe wonke amacala anzima kuwe bona baqume amacala alula. Lokho kuzakwenza ukuthi umthwalo wakho ube lula ngoba bazabe besabelana lawe. 23 Uma ungakwenza lokhu njengoba kungumlayo kaNkulunkulu, uzakwenelisa ukuphumuza ingqondo njalo abantu bonke laba bazabuyela emakhaya besuthisekile.”

24 UMosi wamlalela uyisezala wenza konke ayekutshilo. 25 Wakhetha amadoda anelisayo phakathi kuka-Israyeli wonke wabenza abakhokheli babantu, izinduna zezinkulungwane, zamakhulu, lamatshumi amahlanu lezamatshumi. 26 Baba ngabahluleli babantu kuso sonke isikhathi. Amacala anzima bawaletha kuMosi, kodwa alula bawathonisa bona ngokwabo. 27 UMosi wavalelisana loyisezala, uJethro wasebuyela elizweni lakhe.